ភ្នំពេញ៖ រដ្ឋមន្ត្រីទំនាក់ទំនងរដ្ឋសភា-ព្រឹទ្ធសភា លោកស្រី ម៉ែន សំអន បានផ្ញើរលិខិតជូនពរសម្ដេចធម្មវិសុទ្ធវង្សា សៅ ទី ហេងសំរិន ក្នុងឱកាសខួបកំណើតគម្រប់ជន្មាយុ ៨៥ឆ្នាំ ឈានចូល ៨៦ឆ្នាំ របស់សម្តេច។

ក្នុងលិខិតនោះលោកស្រី ម៉ែន សំអន បានសម្ដែងនូវសេចក្តីគោរពចំពោះ សម្តេចធម្មវិសុទ្ធវង្សា ដែលបានលះបង់អស់កម្លាំងកាយចិត្ត ប្រាជ្ញា ស្មារតី និងធនធានផ្ទាល់ខ្លួន ដើម្បីរួមចំណែកដ៏ធំធេងជាមួយរាជរដ្ឋាភិបាលកម្ពុជាក្នុងវិស័យមនុស្សធម៌ និងបានដោះស្រាយរាល់ទុក្ខលំបាករបស់ប្រជាពលរដ្ឋ ជាពិសេសស្ត្រីនិងកុមារ ក៏ដូចជាបានធ្វើឱ្យប្រជាជនកម្ពុជា ទាំងមូលរស់នៅប្រកបដោយសុភមង្គល ភាពសម្បូររុងរឿង និងការអភិវឌ្ឍ។

លោកស្រីបន្ថែមថា៖ «យើងខ្ញុំសូមបួងសួងដល់គុណបុណ្យព្រះរតនត្រ័យ វត្ថុស័ក្តិសិទ្ធិក្នុងលោកសូមតាមជួយបីបាច់ ថែរក្សា សម្ដេចធម្មវិសុទ្ធវង្សា និងសម្ដេចអគ្គមហាពញាចក្រី ព្រមទាំងបុត្រាបុត្រី និងចៅៗជាទីស្រលាញ់ សូមមានសុខភាពល្អបរិបូរណ៍ កម្លាំងមាំមួន ជន្មាយុយឺនយូរ និងសូមបានប្រកបដោយពុទ្ធពរទាំងបួនប្រការគឺ អាយុ វណ្ណៈ សុខៈ ពលៈ កុំបីឃ្លៀងឃ្លាតឡើយ»។

គួរឱ្យដឹងដែរថាសម្ដេចធម្មវិសុទ្ធវង្សា សៅ ទី ហេងសំរិន នឹងចម្រើនជន្មាយុគម្រប់ ៨៥ឆ្នាំ ឈានចូល ៨៦ឆ្នាំនៅថ្ងៃព្រហស្បតិ៍ ទី២៣ ខែកុម្ភៈ ឆ្នាំ២០២៣ ខាងមុខនេះ៕